Landbruksdirektoratet lyste i fjor haust ut søknadsprosess om tilskot til å fremje hestesport, -hald og -avl. Norges Fjordhestlag leverte inn søknadar til fire prosjekt, og fekk innvilga tre av desse:
Genetisk variasjon hos fjordhesten – Tildelt inntil kr. 1 690 000
Prosjektperiode: 01.03.2025-01.03.2028
Overordna mål: Kartlegge genetisk varisasjon og helseutfordringar hos fjordhesten, og bevare genetisk variasjon gjennom god forvaltning av rasen.
Desse måla skal nås gjennom mellom anna:
- Berekningar av innavlsgrad, slektskap til populasjonen og kinship for å overvåke innavlsutvikling, kartlegge genetisk variasjon og identifisere individ som er mindre beslekta med resten av populasjonen.
- Genotype om lag 100 individ for å berekne genomisk slektskap.
- Utarbeide og sende ut spørjeskjema for å kartlegge helseutfordringar hos fjordhesten.
- Arrangere regionale samlingar for unge hingstar som skal visast på kåring
- Utarbeide retningslinjer for kåring av hingst på bakgrunn av stamme og farge basert på objektive mål.
- Stimulere til avl og til at oppdrettarar tek vare på den genetiske variasjonen hos fjordhest gjennom bruk av tilskot.
Felles internasjonalt register og avlsplan – Tildelt inntil kr. 1 500 000
Prosjektperiode Frå 01.03.2025 Til 31.12.2027
Overordna mål: Påverke fjordhestens avlsmål og bevaring i populasjonar utanfor Noreg. På lengre sikt er målet å etablere eit felles register i Noreg også for fjordhestar i andre land.
Midlane i prosjektet skal brukast til:
- Tilby norske dommarar til tre årlege utanlandske utstillingar dei neste tre åra.
- Representantar frå NFL skal møte og delta på større utstillingar og møter internasjonalt for å innhente kunnskap om organisering og avl.
- Arrangere årlege dommarsamlingar der norske dommarar og utanlandske dommarar kan kalibrere seg med omsyn til bedømming av fjordhest, og slik betre utvikle evna til å fremje viktige fenotypiske trekk.
- Granske stammer og DNA-teste for å innhente kunnskap om utanlandske hestar i oppbygginga av eit framtidig felles register.
- Oversetjing av avslplanen.
Felles Haustmøte – Tildelt inntil kr. 300 000
(Fellesprosjekt for Norges Fjordhestlag, Landslaget for Dølahest og Landslaget for nordlandshest/lyngshest)
Prosjektperiode: 01.04.2025-01.12.2025
Overordna mål: Samle medlemane i NFL, LD og LNL til felles Haustmøte i 2025 for å auke kompetansenivået til eigarar, brukarar og oppdrettarar av rasane fjordhest, dølahest og nordlandshest/lyngshest.
Midlane vil brukast til å leige inn dyktige og relevante foredragshaldarar samt å dekke nokre av kostnadane ved opphaldet og dermed redusere prisen for deltakarane.
Norges Fjordhestlag søkte også om midlar til planlegging av ”Nasjonal arena for fjordhest til fremme av avl, sport og god hestevelferd”, og bisto lokal arrangør i søknad om midlar til å dekke oppstalling for deltakarane under NM og nordisk 2025. Desse søknadane vart ikkje innvilga.
