Avlsfremjande midlar frå Norges Fjordhestlag 2025

På grunn av ein pressa økonomisk situasjon hos Norsk Hestesenter, har Norges Fjordhestlag ikkje fått ordinære avlsmidlar i 2025. Gjennom prosjektet «Genetisk variasjon hos fjordhesten» (les meir om prosjektet her) har vi høve til å stimulere til avl som tek vare på genetisk variasjon, som skissert i prosjektet. Dette er grunnen til at årets kriterie for tildeling av avlsmidlar er endra samanlikna med tidlegare år.

Dette er tilskota ein vil kunne søke på i 2025:

Tilskot til jamnare genetisk bidrag

Lokallag i Norges Fjordhestlag som kjøper eller leiger hingst vil i år kunne få kr. 20 000 i støtte. Lag kan få støtte til fleire hingstar. Følgjande krav gjeld for å kvalifisere til tilskot:

• Hingsten kan ikkje ha meir enn 20 norskregistrerte avkom per 01.05.25
• Hingsten må bedekke 1-12 hopper
• Hingsten må vere tilgjengeleg på slepp eller i stasjon i minst 6 veker
• Tilskotet omfattar alle kåra og premierte hingstar f. 2020, 2021 og 2022, i tillegg til Odals Viking, Løkke Safir, Endalen, Råtassen, Vassliås Bruse, Viking Fjord, Myklemo Baronen, Nygårds Gurven, Soltuns Trym, Flemming og Veslefrikk Roman.

Tilskot til bedekking av unge hopper

• 3-årshopper med premiegrad eller sløyfe vert tildelt kr. 1500 i tilskot
• Premierte hopper 4-5 år vert tildelt kr. 1500 i tilskot
• Hoppa treng ikkje vere premiert på bedekningstidspunktet, men må ha premiegrad innan søknadsfristen 1. oktober
• Innavlsgraden på avkommet må ikkje overstige 12,5% for å kvalifisere til tilskot.

Tilskot til bevaring av genetisk variasjon

• 1500 kr. i tilskot til premierte hopper 6 år og eldre som har maks to registrerte føl
• Innavlsgraden på avkommet må ikkje overstige 12,5% for å kvalifisere til tilskot.

Tilskot til bevaring av stamme

• 5000 kr i tilskot til 1. premiehopper som blir bedekt med hingst maks 7 år som er kåra eller premiert med vekt på stamme
• 3000 kr i tilskot til 2. premiehopper som blir bedekt med hingst maks 7 år som er kåra eller premiert med vekt på stamme
• Innavlsgraden på avkommet må ikkje overstige 12,5% for å kvalifisere til tilskot.
• Tilskotet omfattar hingstane Skeidsvolls Torvald, Jakobgardens Luring, Solli Rheo, Endalen og Vassliås Bruse.

Tilskot til bevaring av farge

• 5000 kr i tilskot til 1. premiehopper som blir bedekt med raudblakk, gulblakk, grå eller ulsblakk hingst på maks 7 år
• 3000 kr i tilskot til 2. premiehopper som blir bedekt med raudblakk, gulblakk, grå eller ulsblakk hingst på maks 7 år
• Innavlsgraden på avkommet må ikkje overstige 12,5% for å kvalifisere til tilskot.
• Det vert ikkje gitt tilskot til kombinasjonar der avkommet kan bli blåaugd kvit (uls-/gulblakke hopper til uls-/gulblakk hingst).
• Tilskotet omfattar hingstane Jakobgardens Luring, Zildar van den Bosdries, Almas Oker og Sjangsis Elvin.

Ein må vere medlem i Norges Fjordhestlag for å kunne motta tilskot. Alle tilskota har søknadsfrist 1. oktober 2025. Det vil publiserast eit søknadsskjema på denne sida som skal nyttast.