Oppdrettarprisen for 2017 vart delt ut under utstillingsmiddagen på Nordfjord hotell fredag. Vinnar av den gjeve prisen er Vidar og Jorunn Heggheim.
Å vere både oppdrettar, eigar og utstillar av både spissen og nummer to i kvalitet i treårsklassen på hingsteutstillinga vitnar om eit godt auge for gode avlskombinasjonar og ei evne til å vise hestane frå si beste side til rett tid. Det er difor vel fortent at oppdrettarprisen går til nettopp desse to Naustdølane, som i tillegg var oppdrettar på to viste hopper i fjor.
Birkelid Tullen e. Kornvin Freidig u. Birkelid Tulla vart spiss i treårsklassa på hingsteutstillinga i fjor. Rett bak kom Birkelid Nimo, e. Ninjar u. Birkely Monja. Nimo er det siste følet til no avdøde Birkely Monja, som fekk 1. premie for individ og Elite for avkom. Ho har gjennom sine mange avkom bidratt positivt til fjordhestavlen dei siste åra.
Birkelid Tullen
Birkelid Nimo
På hoppeutstillinga i Førde fekk Birkelid Oda (e. Fløgstad Odin u. Birkely Monja) 1. premie og vart kåra til «Dagens hest». Ho var den einaste fjordhoppa som fekk 1. premie i fjor.
Birkelid Oda (Foto: Inger Grønntun)
To år gamle Birkelid Huldra (e. Kamillas Tord u. Birkelid Tulla) er eigd av Audun Næs og Saija M. Mäntylä. Ho stod spiss i toårsklassen på unghestskue på Voss i fjor, og vart også kåra til beste unghest under landsfinalen for unghopper i Seljord.
Foto: Jorunn Heggheim
Norges Fjordhestlag gratulerer Vidar og Jorunn Heggheim med oppdrettarprisen for 2017, og takkar dei for det fantastiske arbeidet dei gjer for fjordhesten.
